Қолыңыздағы күнделік — «Кемел адам» кітабының негізінде уақытты тиімді пайдалану мен жұмысты жоспарлауға көмектесетін 90 күнге арналған арнайы қосымша құрал.
Адам бойындағы сапалы қуат мөлшері — 20%. Осынау ішкі энергияны маңызды істерге жұмсай білу аса пайдалы. Күнделікке күні бойы атқарылатын 3 маңызды істі бөлек жазу арқылы миыңызды сол іске шоғырландырып, айрықша назарыңызды аудара аласыз. Шұғыл шаруалардың маңызды істеріңізді ысырып тастауына жол бермейсіз. Күн сайын ең маңызды деген 3 істі парыз деңгейінде жасай алған адам алға қойған мақсатына сөзсіз жетеді.

Ал екінші деңгейлі істерді бөлек бөліп жазу арқылы қажет жағдайда оларды аса шұғыл істермен алмастыруға жағдай жасайсыз. Яғни, күндік жоспарыңыз өзгертуге өте икемді болады. Сонда маңызды деп тапқан ісіңіз де, шұғыл шаруалар да орындалып отырады. Екінші деңгейдегі істерді жасай алмай қалсаңыз, өзіңізді кінәлі сезінбейсіз. Орынсыз стреске түспейсіз. Өмірдің қарапайым қуанышынан қағылмайсыз.
Осы күнделікте өзіңіз ұстанатын дағдылардың тұрақты орындалуын қадағалау арқылы жетістікке бір табан жақындай түсесіз, әрі күндік өнімділігіңізді де бақылап отырасыз.

Күнделікті шағын жазба жазуға арнайы орын да қарастырылған. Үйренген инсайттар мен түйген ой-пікірлеріңізді күн сайын түртіп отыру арқылы есте жақсы сақталуын қамтамасыз етесіз.

Күнделіктің әр бетінде қазақ зиялылары мен шетелдік танымал тұлғалардың сізді жігерлендіріп, ынтаңызды оятатын қанатты сөздері бар.