Қазақ халқының тарихи тұлғалары

Өнер баспасы сонау қажет ежелгі мыңжылдықтардан күні кешегі кезенімізге дейін қазіргі қазақ даласында немесе одан тыс өмір сүрген және ХХІ ғасырдағы қазақ жұртының рухани, мәдени, тарихи арнасына тікелей қатысы бар тұлғалар туралы қилы-қилы дереккөздерден жинақтап, «Қазақ халқының тарихи тұлғалары» атты қысқа анықтамалық кітаптар сериясын шығаруға кірісті. Тарихи тұлғаларды рухани жадымызда иеленген орнына және өмір сүрген кезеңдеріне қарай жүйелеп, жеке тарауларға топтастырдық. Кітап көлемі шағын болғандықтан, әрбір тұлғаның негізгі өмір белестерін ғана қамтып, ондағы басым оқиғаларды түпкі арқау етіп ұстандық.

Анықтамалықтың 1-кітабында көне дүние кезіндегі Анахарсистен бермен қарайғы әйгілі әулие-абыздар, аңыз тұлғалар, ойшыл ғұламалар мен дінбасылар, ежелгі хандар мен билер, батырлар мен жыраулар және халықтан шыққан қарапайым еңбек ерлерінің өмірі туралы мағлұматтар берілді.

Анықтамалықтың 2-кітабына тарихымыздың ХІХ, ХХ және ХХІ ғасырында өмір сүрген ұлттық қайраткерлер, ақын-жазушылар, күш алыптары, ғалымдар, суретшілер, сәулетшілер-архитекторлар мен өнер тарландарының өмірі туралы мағлұматтар берілді.

«Қазақ халқының тарихи тұлғаларының» қолдарыңыздағы 3-кітабы бастан-аяқ тек қана адамзат тарихындағы қасиетті аналарға, соның ішінде қазақтың абыз-аңыз аналары мен қалың елдің туы болып, көш бастаған, ұлттың ар-ұятына, махаббат символына айналған қыздарына арналып отыр.

Деректерді жан-жақты жинақтап, зерделеп, оқырманға әрбір есімнің өзіндік болмысын нақтылап ашатындай етіп беруге тырыстық. Бұл кітап Елім, Халқым, Жерім деп тебіренетін әрбір қазақтың төрінен де, жүрегінен де өз орнын алатындығына нық сенімдіміз.