| Естеліктер (2-томдық шығармалар жинағы) Әзілхан Нұршайықов Автордың бұл екі томдық шығармалар жинағына ХХ ғасырда өмір сүріп, өмірлері қалың жұртқа өнеге болған атақты адамдар туралы естелік әңгімелері, олар туралы ойлары еңгізілген. Жас ұрпақ тәрбиесі үшін ғибраты мол құнды туындыны автор көзі тірісінде жарыққа шығара алмай кеткен еді. Алайда бұл естелік кітапты жазушының ұл-қыздары әке аманатын орындау мақсатында шығарып, сүйікті оқырмандарына ұсынып отыр.
Аталған кітаптарда — Әбдіжәміл Нұрпейісов, Мұзафар Әлімбаев, Тұманбай Молдағалиев, Зейнолла Қабдолов, Серік Қирабаев, Сәуірбек Бақбергенов, Қайнекей Жармағамбетов, Ғали Орманов Жұмағали Ысмағұлов т. б. белгілі қазақ қаламгерлерінің және өзінің сүйікті ұстазы Мұқан Иманжановтың өмірінен қызықты сыр шертетін шығармашылық және тұрмыстық штрих-детальдар, сәтті эпизодтар мол.
Өмірінің соңғы сәтінде баспаға дайындалған бұл жинаққа бұрыңғы жинақтарына еңбей қалған бірқатар эссе, естеліктер мен деректі хикаялары, хаттары мен өз әулетіне қатысты шежіре-баяны еніп отыр. Олардың арасында замананың заңға жазушысы М.Әуезовтен бастап, С. Мұқанов, М.Иманжанов, Ә.Тәжібаев, Ғ.Сланов, Д. Снегин т. б. қазақ зиялылары жайында көркем тілмен әңгімеленген құнарлы қатирелер аз емес.
Алғашқы томда 1942 жылы майданға «Абай» романының бірінші кітабын арқалай аттанып, төрт жылы бойына жауынгерлердің жүрегіне жылу мен жігер ұялатқан жәдігерді жанынан тастамай, жоғалтпай елге оралған еңдігі университет студентінің ұлы жазушымен дәрісханада қалай танысқаны әсерлі суреттелген. |
