Өкініш

Мира Шүйіншәлиева

Республика оқырмандарына әңгіме, хикая, повесть, драматургия жанрындағы әдеби көркем кітаптарымен кеңінен танылған талантты жазушы Мира Шүйіншәлиеваның «Өкініш» атты кітабы қазіргі көркем прозаның алдыңғы қатарынан орын алады. Тіпті, атақты сыншы, әдебиет зерттеушісі Б.Сарбалаұлы «Өкініш» повесін роман деп бағаласа, белгілі ғылым докторы, әдебиеттанушы Г.Орда бұл еңбек жайлы газет-журналдарға көптеген мақалалар жазды.

Айналамызда өмір сүріп жатқан адамдар арасындағы қарым-қатынас, қақтығыс, махаббат, сезімі мен сыны, сан қилы тағдыр тәлкегі арқау болған көркем дүние оқырманды өзіне баурап алады, жетелеп әкетеді. Үш бөлімнен тұратын көлемді повесті оқи отырып, шым-шытырық оқиғаларға тап келесіз. Тілі жүйрік, қаламы ұшқыр қаламгердің сюжет құраудағы шеберлігі, ой саптаудағы тапқырлығы, кейіпкерлердің түрлі мінезі шығармаға деген қызығушылығыңызды оятады. Бұл повесте сатқындық пен ар-намыстан аттау секілді күйбең тіршілікте кездесіп отыратын құбылыстар да ойлы оқырманды ойландырмай қоймайды.